By special Request

Dahil nirekwest ni Zen Bitch... here's the winning poem in Gawad Komisyon sa Wikang Filipino.

Pasensya na at mahaba haba kasi ang nirerequire sa rules ay at least 100 lines daw. At pasensya na dahil walang translations pa ito. Kung sino me gana mag translate, welcome na welcome.

The poem is done in traditional Hiligaynon Komposo (song) for a Harana with four lines per stanza and eight syllables per line, meant to be accompanied by acoustic guitar.

Enjoy and thank you for the warm congratuations.

Lagtok Tilaok,Lanton Panagitlon

Ni: Luis Batchoy

“Uso pa ba ang harana?”
-Harana
Parokya ni Edgar


Pamatii hinigugma,
Ining akon pangalaba.
Ginabatyag ko nga gugma,
Ipabutyag sa pag amba.

Kuntani, mapasayluhan,
Kun libagun pamati-an.
Ano abi kay ang tilaok,
Sa kagutmon, nagalagtok.

Ining akon nga kauhaw,
Yuhum mo makapaumpaw.
Sa bagtik nga balatyagon.
Tubig nga mapadalundon.

T’yan ko nga nagaragu-ok,
Makanay sa imong tulok.
Wa’ay man sulod ang bulsa,
Tigalumapaw ang gugma.

Kaina sang pagkabugtaw,
Kapog lang ang ginpamahaw.
Kay mahal na gid ang bugas,
Gutom pilit lang mabatas.

Handum ko ikaw halaran,
Mga bitu-on kag bulan.
Apang, kutob ikasarang,
Tapulanga na gid lamang.

Mamasyar kita kuntani,
Didto sa lugar nga nami.
Pai, mahal dun ang pam’lete,
Damgo na gid lang ang libre.

Apang ayaw kabalaka,
Palangga, may kahaygan pa.
Mangita ako trabaho,
Agud isagud sa imo.

Sa ‘call center’ daku sweldo,
‘Gwantahun lang ang katuyo.
‘Balo man ko mag ininglis,
Bisan medyo kinamatis.

Pwede man, mag ubra sa ‘gwa.
Ang akun lang gid nga kulba,
Nga sa akun pagkadula,
May iban ka nga makita.

‘Di bale, budlay ang ubra,
May kwarta lang mapadala.
Bisan imo lang isugal,
‘Di lang magpatol kay ‘pre Val.

‘Gwantahun ko ang kamingaw,
‘Di ka lang maalimunaw.
Luguson man ka Arabo,
Indi ka lang mag pangamo.

Kay damo man ‘bi problema,
Diri sa aton nga banwa.
Anhon man lang pag salama,
Sang ‘powers’ ni Tiya’y Glorya.

Kung madalum atun bulsa,
Mas dalum pa gid ang iya.
Dako gid ‘na nga problema,
Kung mag niwang iya bana.

Basta malipayun sila,
‘Ber mag taas gasolina.
Amo gid ‘na ‘ya ang gugma.
Par’yas lang sa’ton nga duha.

Pamati bala sang SONA,
Kay naga uswag na kita.
Ga arti lang ang pigado,
Puro lang sila reklamo.

Damo na gani ang taytay,
Dapat didto ta ma latay.
Pag baha, ma saka didto,
Tani wa’y may na lunod no?

Indi na lang pag sapaka,
Ang kuno, nangawat kwarta.
Kay syempre, tapos eleksyon,
Gastos, ila gid bawi-on.

Natural, kung ‘ga negosyo,
Padaku-on gid benta mo.
Taw-i lang kwarta ang tawo,
Kay ikaw g’yapun iboto.

Luyag mo maharanahan?
‘Nali ikaw, ma buki-an.
Kay indi na uso subong,
Gulpi na lang ‘ya mabusong.

Buki ang kulukumposo
‘Text-text’ na lang nga tag piso.
‘Di na bulak iregalo,
Pasa-load na ang mas gusto.

‘Di na kina’nglan mag sulat,
Pwede na man lang maka ‘chat.’
Kag ma ka kit-anay na ‘ya,
‘Cam to cam’ lang sa ka’sturya.

Pwede na gani bulagan,
Gulpi ka na lang ‘ya ‘textan.’
“Sori gd d na me sa u.”
‘Replyan’ n’ya lang ka “Hu u”?

Gugma, indi subong sina,
Ang akun pag palangga.
Kabudlay, dili balihon,
Lamang, gugma mo ma angkun.

Bisitahan, pangaluy’gan,
Akun ka binalaybayan.
Kahoy, akun agwadahun,
Tubig, akun nga bis-akun.

Buhatan ‘ta ‘kaw komposo,
Harana, ‘ber ‘di na uso.
Wala na man arinola,
Nga sa ‘kun pwede ma basya.

Gani ining lalantunon,
Pasayluhi kung libagon.
Kay sing limahun, nahubsan,
Pang praktis sa bidyokehan.

Daw tukturu-ok ka manok,
Nagalagtok nga tila-ok.
Mapauntat mo lang ako,
Kung sabton sang imo huo.

Ang hanagub, madalom na,
Pagpuli, gutuson ko pa.
Luyag ko lang mabatian,
Nga ako palangga mo man.

Pamatii hinigugma,
Ining akon pangalaba.
Ginabatyag ko nga gugma,
Ipabutyag sa pag amba.

Photo Credit:

http://entertainment.webshots.com/